Нарын областтык казыятынын басма сөз кызматы “Turmush” сайтына кабар беришинче, Ат-Башы районуна караштуу Бирлик айылынын калкы сооптуу ишти баштады.
Айылдын көпчүлүк жашоочулары, айыл башчысы, айрыкча жаштары демилге көтөрүп, айылда болгону 4 дүкөн болсо, аларда сатылып жаткан ичкиликтин айыл элине, жаштарга, келечек муунга пайдасы жок экендигин айтышты. Мындан улам дүкөн ээлерине түшүндүрүү жолу менен ичкилик сатууга тыюу салышты.
Аны менен бирге соода жайларында жана той-топурларда ичкилик ичүүгө тыюу салынары да айтылып, эл тарабынан бул сунуш колдоо тапты.
“Албетте бул Бирлик айылынын жашоочулары, деги эле кыргыз элинин келечеги үчүн эң жакшы саамалык. Башка айылдар да үлгү алса болот. Бирлик айылынын имамы Рысбек молдонун жана айыл башчысынын чакыруусу менен Нарын облусунун казысы Мамбетасан Ибраев атайын Бирлик айылына барып, жакшы саамалыкты баштаган элге ыраазычылык билдирүү менен ичкилик сатууну такыр токтоткон дүкөн ээлерине казыяттын атынан Ыраазычылык баракчасын тапшырды. О.э. мындай жакшы саамалыктардын башка айылдарга да жайылуусун каалады”, – деп айтылат кабарда.
Туркистон:
Биз да Бирлик айылы баштаган бул жакшы иш тездик менен башка шаар жана айылдарга жайылышын тилейбиз. Себеби, бул илдет пайдасы жок болгондугунан тышкары, Аллах тарабынан арам кылынган нерсе.
Аллах Таала айтат:
“Эй момундар, арак (мас кыла турган ичкилик ичүү), кумар (ойноо), буддалар(га сыйынуу) жана таякчалар (менен бал ачуу) – шайтандын амалынан болгон арам иштер. Эми, нажат табышыңар үчүн алардын ар биринен алыс болгула. Ичкилик, кумар себептүү шайтан араңарга жек көрүү, душмандык салууну о.э. силерди Алланы зикир кылуудан жана намаз окуудан тосууну гана каалайт! Эми, токторсуңар!”. (5:90-91)
Мындан тышкары, Амр ибн Ас розияллоху анхудан риваят кылынган хадисте пайгамбарыбыз Мухаммад саллоллоху алайхи ва саллам:
“Хамр (мас кылуучу ичимдик) жамандыктардын энеси. Кимде-ким аны ичсе Аллах кырк күнгө чейин намазын кабыл албайт. Эгерде хамр анын ичинде турганда өлсө, жахилият өлүмүндө өлгөн болот”, – деген. (Даримий риваяты).
Мына ушундай демилге жана умтулуулар менен биз өзүбүздү өзгөртүп барсак, Аллах Таала биздин аӊ-сезимибиз, пикирибиз жана жашообузду өзгөртүп, Өзү ыраазы боло турган жолго багыттап коёт.
“Акыйкатта, коом өздөрүндөгү нерсени өзгөртмөйүнчө, Алла аны өзгөртпөйт” (13:11).
