Чет элдик басылмалар тарабынан Казакстан НАТО күчтөрү үчүн Актау портун ачып коюуга уруксат бергендиги кабарланууда. Бирок, бул тууралуу Казакстандагы америка элчилиги чурк этип ооз ача элек о.э. ситуацияга карата комментарий да бере элек. Бир катар батыш басылмалары – коалиция күчтөрүн Афганистандан алып чыгып кетүү учурунда Казакстан нато күчтөрү үчүн ачык болот, мүмкүн андан кийин да ачык бойдон калышы ыктымал – деп билдиришти.
Эскерте кетсек, тээ 2013-жылы апрелде, Афганистан боюнча “Стамбул процессинин” тышкы иштер министрлеринин конференциясы болуп өткөн. Анда Нурсултан Назарбаев Афганистанда «Уратылгыс эркиндик» миссиясы аягына чыгышы үчүн, Казакстан НАТО жүктөрү үчүн Актау портун ачууга даяр деп билдирген.
“Эл аралык күчтөр Афганистан коопсуздугун коргоого жардам бере баштагандан бери, Казакстан коалиция кошуунуна кол кабыш кылып келет. Бул иш жүк жеткирүү боюнча альянс менен болгон макулдашуунун о.э. АКШ, Германия, Франция, Испания жана Великобританиялар менен түзүлгөн кош тараптуу келишимдердин алкагында аткарылат. Азыр биз НАТО жүктөрүнүн транзиттик потенциалын Каспийдин казакстандык порту “Актау”нун эсебинен кеңейтүүгө даярданып жатабыз, – деп белгилеген Назарбаев.
Мындай маалыматтар каршысында, казакстандык аскерий командачылык Актау порту НАТО күчтөрү үчүн ачык экендиги тууралуу эч качан ачык билдирүү жасаган эмес. О.э. Актауда натолук аскерийлер контингенти барбы же жокпу, болсо алардын саны канча – булар тууралуу да азырынча расмий комментарийлер бериле элек.
Түркиялык басылма Dunyabulteni.netтин билдирүүсүнө ылайык, 2014-жыл ичи бою Афганистандан жүк ташып чыгуу үчүн ушул порттон пайдаланылмакчы. Бирок, расмий билдирүүлөр болбогондуктан, мындай маалыматтын чын-төгүнүн ырастоо мүмкүн эмес.
Лекин белгилей кетчү жагдай, Кыргызстандагы аскерий базаны бул жакка көчүрүү версиясы АКШ үчүн жакшы бир вариант болуп калууда. Анткени, Актау порту Америка назарында, Борбордук Азияда о.э. Каспийде өз таасирин күчөтүүчү бир ыкма катары зор мааниге ээ .
