Бишкекте 1-ноябрдан тарта жол акы 25 сом болот

Бишкекте 1-ноябрдан тарта жол  акы 25 сом болот

1-ноябрдан тарта Бишкектеги автобус менен троллейбустарда накталай төлөм 25 сом болуп кымбаттайт. Бул тууралуу вице-мэр Максатбек Сазыкулов билдирди.

Анын айтымында, автобус менен троллейбустарда жол кире накталай төлөнсө 25 сом болот, ал эми накталай эмес төлөмдө 11 сом бойдон калат. Маршруткаларга жол кире мурункудай 15 сом болот.

Сазыкулов муну менен элди накталай эмес төлөм системасына көндүрүү мерчемделип жатканын кошумчалады. Ал буга чейин жогорудагы тариф шаарга жаңы автобустар толук келип бүткөнчө колдонуларын айткан. Демек, карта менен 11 сомдон төлөө тарифи да тез күндөрдө өзгөрүшү толук мүмкүн.

Тилекке каршы, Кыргызстанда ар бир келген өкмөт калктын жонунан кайыш тилүү жолун карманууда. Жол кире кымбаттатуудан тышкары, айдоочулар үчүн милдеттүү камсыздандыруу мыйзамын күчүнө киргизип, жол үчүн салык салууну сунуштап жатат. Жол үчүн алына турган каражат автунаага куюлган ар бир литр бензинге 1 сом кошулуп алынмакчы. Булардын баары ансыз да каржалып турган калктын жакырчылыгын дагы да күчөтүшү талашсыз.

Дүйнөлүк банктын отчётуна ылайык 2022-жылдын жыйынтыгы боюнча Кыргызстанда жакырчылыктын деңгээли 25,5 пайызга өскөн. Отчётто баса белгиленгендей, азык-түлүк бааларынын жогорулугу жана жумуш менен камсыздоонун кепилдиги жок болгондугу эң негизги проблема бойдон калууда.

Түпкүлүгүндө, карыз менен бюджетти толтуруу жана өндүрүштү жолго койбой туруп айлык акыны көтөрүү өлкөдөгү инфляцияны дагы да күчөтүүдө. Башкача айтканда, баалар менен кызмат акылар эселеп өсүүдө.

Үстүбүзгө капитализм колдонулганы себептүү бүт дүйнө эли, анын ичинде Кыргызстан калкы да мына ушундай зулумдар чеңгелинде жашап жатышат. Мунун каршысында Ислам байлык бир ууч капиталист-монополисттердин колуна топтолуп калышына да, карапайым калктын түрдүү салыктарды төлөп калышына да уруксат бербейт. Тескерисинче, байлыкты байлардан алып муктаждарга бөлүштүрүү менен, коомдогу бакубат жашоону, тең салмактуулукту ордуна коёт! Бул тең салмактуулукту зекет жана мурас өкүмдөрү сыяктуу өкүмдөр толук камсыздап берет. Анткени, ал мыйзамдар алсыз адамдын акылынан чыккан эмес, балким, алар күч-кудурет ээси болгон Аллах Тааланын пенделери үчүн берген мыйзамдары!

Мумтаз Маверанахрий