Эмомали Рахмон жана В.Путин биргелешкен билдирүү беришти

Эмомали Рахмон жана В.Путин биргелешкен билдирүү беришти

Россияга иш сапары менен барган Тажик президенти 17-апрель күнү Орусия президенти В.Путин менен жолугушту. Эки өлкө башчылары жабык эшик артында 1 саат сүйлөшүү жүргүзгөндөн кийин ЖМКга биргелешкен билдирүү беришти.

 Билдирүүрдө В.Путин, “Жыл сайын эки өлкөнүн соода алакасы туруктуу өсүүдө. Үстүбүздөгү жылы 25%га өсүп 900млн долларга жетти. Тажикстандын нефтепродуктуга болгон муктажыгын дээрлик толугу менен Россия камсыздайт”, деди.

 Ал сөзүн: “Сүйлөшүүлөрдүн жүрүшүндө коопсуздук маселесин да тыкыр талкууга алдык.  Борбор азиядагы тынчтыкты сактоо, Афганистандан келип жаткан коркунучка каршы туруу о.э. терроризмге, маңзатка каршы күрөшүү жана аскердик-техникалык тармактарда тыгыз иштешүүгө келиштик”, – деп жыйынтыктады.

Өз кезегинде Тажикстан президенти, Орусияда эмгектенип жүргөн тажик жарандарына миграциялык мунапыс берилишине үмүт артарын жана өз жарандарынын каттоого туруу жана патент алуу жол-жобосун жөнөкөйлөтүүнү суранарын билдирди.

Тышкы иштер министрлери Тажикстандан Россияга кирип жаткан товарлардын фитосанитардык талаптары туурасында жана баңгизаттар соодасына бөгөт коюу жаатында келишимдерге кол коюшту.

Рахмон бул иш сапарга Орусия президентинин чакыруусу менен барды.

Эскерте кетсек, СССРдин мураскору катары калган Россия Орто Азияны өз колониясы деп билет. Ошондуктан бул аймактагы саясий, экономикалык абалды ар дайым көзөмөлдө кармоого аракет кылат.

Акыркы учурда Кытайдын регионго экономикалык жактан кирип келүүсү бул аймакта жаңы геосаясий кырдаал жаратты. О.э. акырындык менен бул мамлекеттерде Кытайга ыктаган саясатчылар да пайда болуп барууда.  

Ушундай абалдарга байланыштуу, Россия президенти жакында Кыргызстанга масштабдуу иш сапары менен келип кетти. Андан соң, Казакстан президентин чакыртты. Мына эми Тажикстан президентин иш сапары менен келип кетүүгө чакырды.

Али Мауранахрий