Трамп менен Путин жолугушуудан кийин биргелешкен маалымат жыйынын өткөрүштү
Россия президенти Владимир Путин менен АКШ президенти Дональд Трамп Финляндиянын борбору Хельсинкиде жолугушкандан кийин ортоктош маалымат жыйынын өткөрүштү. Маалымат жыйынында эки жетекчи тең журналисттерге талкууланган айрым маселелер тууралуу маалымат беришти.
Маалымат жыйынында президент Владимир Путин суук согуш бүткөндүгүн айтып, азыркы доор терроризмге (Исламга) каршы күрөшүү доору экендигине ишара кылды.
“Суук согуш аяктагандан бери көп убакыт өттү. Ал доор эки мамлекет ортосунда идеологиялык карама-каршылыктар доору болду. Бүгүн болсо дүйнөдө абал бүтүндөй өзгөрдү. Россия жана АКШ башка проблемаларга дуушар болууда.Терроризм жана эл аралык кылмыштуулук коркунучу, коопсуздук жана эл аралык туруксуздук механизми балансынын бузулушу о.э. дүйнөлүк экономикада күчөп бара жаткан проблемалар ушулар түркүмүнөн”, – деди президент Путин.
О.э. Путин терроризмге каршы күрөш боюнча расмий Москва “биргелешкен аракет” тобун кайрадан тикелөөнү сунуштагандыгын билдирди. Бул аркылуу эки мамлекеттин разведка кызматтары ортосундагы алаканы туруктуу көрүнүштө жолго коюуга чакырды.
АКШ президенти Дональд Трамп да, Москва менен Вашингтон терроризмге каршы күрөштө алакаларды улантышын билдирип, Путин менен жолугушуудан кийин Россия-АКШ мамилесинде өзгөрүш болорун айтты.
Ал: “Россия менен биздин алакабыз азыркыдай жаман болбогон эле. Бирок, бул нерсе төрт саатка созулган жолугушуубуздан кийин өзгөрөт. Албетте, бул нерсе жеңил болбойт. Бирок, бул жолугушуу мүмкүнчүлүгүн четке какканга караганда жакшыраак”, – деди.
Сирия маселесинде болсо, Путин АКШ менен Россия эч күмөнсүз, жетекчилик ролду ойношун айтты. Анын айтымында, бул эки мамлекет гуманитардык кризисти жоюу о.э. качкындар үйлөрүнө кайтышы үчүн жардам берүүгө кызматташтыкты уюштурушу мүмкүн.
Өз кезегинде Трамп да Сирияда Россия жана АКШ аскерлери ортосундагы шайкештикти мактады. О.э. ал Израилдин коопсуздугун камсыздоо керектигине басым жасады.
“Бүгүнкү жолугушуу көпкө созула турган жараяндын башталышы. Биз туруктуу диалогду камсыздай турган келечекти көздөй алгачкы кадамды таштадык”, – деди президент Трамп.
Путин болсо Россия менен АКШ глобалдык нефть жана газ базарын тартипке салуу үчүн биргеликте иш алып барышы мүмкүн экендигин баса белгиледи.
“Биз президент Трамп менен россиялык жана америкалык ишкерлерди бириктире турган жогорку даражалуу топ түзүүгө келишип алдык. Ишкерлер пайдалуу кызматташтыкты куруу жолун жакшыраак билишет”, – деди Путин.
Бирок, Путиндин сөздөрүнөн, Крым маселесинде Москва менен Вашингтон ортосунда карама-каршылык бар экендиги белгилүү болду. АКШ 2014-жылы Россиянын Крымды өзүнө кошуп алышын мыйзамсыз баскынчылык катары баалайт.
“Президент Трамптын Крым боюнча позициясы анык жана ал буга жабышып алган. Ал Крымдын Россия Федерациясына кошулушу мыйзамсыз экендигин айтып келет. Биз болсо башка пикирдебиз. Бул маселе биз үчүн жабык”, – деди Путин.
