Сергей Шойгу кезектеги “суук кабар” менен Ташкентке келди
Афганистандагы кырдаалды туруктуу деп айтууга болбойт, бул нерсе аталган мамлекет аркылуу террорчу топтордун чектеш өлкөлөргө өтүшүнө шарт түзөт. Бул тууралуу РФ коргоо министри Сергей Шойгу өзбекстандык кесиптеши Абдусалом Азизов менен жолугушуу учурунда билдирди.
Шойгунун айтымында, Россия менен Өзбекстан ортосундагы аскерий жана аскерий-техникалык кызматташтык “конкреттүү жана өтө маанилүү мүнөзгө ээ”.
“Бул албетте, биринчи кезекте Өзбекстан чек арасындагы кооп-коркунучтарга байланыштуу. Ушул жерде Сириядан кошуна өлкөлөргө, ошону менен бир катарда Өзбекстанга да өтүп жаткан эл аралык терроризм коркунучу күчөп жатканын айтпай коюу мүмкүн эмес”, – деди Шойгу.
Шойгу эл аралык терроризм коркунучу жайылышына байланыштуу, Россия көп сандагы өзбекстандык аскер кызматкерлерин окутууга, андан тышкары Өзбекстанга аскерий адистерди даярдоо үчүн мугалимдерди жөнөтүүгө даяр экендигин билдирди. Ал Россиядагы окуу жайларда окуп жаткан аскерий адистердин санын “бир нече пайызга эмес, бир нече эсеге көбөйтүүнү” сунуштады.
Шойгунун айтымында, өзбекстандык аскерий адистер Россияда жакшы билим алышууда.
“О.э. өзүнчө план т.а. программа даярдоо маанилүү деп эсептейбиз. Аны болсо август айында Россияда болуп өтүүчү “Армия-2018” эл аралык аскерий-техникалыкалык форум учурунда карап чыгабыз деген үмүттөмүн. Ошондо сиз менен аскерий-техникалык кызматташтык боюнча өкмөттөр аралык комиссиянын жыйынын да өткөрөбүз”, – деди Шойгу.
Сергей Шойгу 21-майда Ташкентке келген. 22-майда Өзбекстандын коргоо министри, генерал-майор Абдусалом Азизовдун Сергей Шойгу менен сүйлөшүүлөрдү өткөрүшү, анда эки өлкө коргоо министрликтери ортосунда аскерий, аскерий-техникалык жана аскерий билим багыттары боюнча кызматташтыктын келечектеги пландары туурасында сөз болору кабарланган.
“ТАСС” агенттигинин кабарына таянсак¸ Өзбекстандын президент Шавкат Мирзиëев РФ коргоо министри Сергей Шойгуну кабыл алган.
Протокол боюнча өткөрүлгөн расмий сүйлөшүүлөрдөн кийин Мирзиëев менен Шойгу жабык эишк артында сүйлөшүүлөрдү өткөрүшкөн. Бир сааттан ашуун убакытка созулган сүйлөшүүлөрдө эмнелер талкуулангандыгы коомчулукка ачыкталбады.
Туркистон:
Өзбекстандын президенти Шавкат Мирзиёев 15-17-майдагы АКШ сапарынын алкагында, эки өлкө ортосунда аскерий жана аскерий-техникалык кызматташтык тармагында алакаларды кеңейтүүгө, бекемдөөгө жана беш жылдык аскерий планды кабыл алууга келишип алган эле.Мирзиёевдин бул сапары жана түзгөн келишимдери Россия өкмөтүн сергек тарттырып койгон окшойт. Себеби, Мирзиёев сапарынан бир нече күндөн кийин т.а. 21-майда Өзбекстан менен РФ президенттери телефон аркылуу байланышкандыгы кабарланды. Телефон аркылуу сүйлөшүүдөн кийин болсо РФ коргоо министри Сергей Шойгу кезектеги кооптуу кабар менен Ташкентке келди.
