Трамп: АКШ экономикалык кризистен соң кайрадан өнүгө баштады
АКШ президенти Дональд Трамп Швейцариянын Давос шаарында болуп өткөн 48-дүйнөлүк экономикалык форумда сүйлөгөн сөзүндө, АКШ экономикасын көккө көтөрүп мактады. Билдирүүсүнүн негизги бөлүгүн глобалдык ишкерлер АКШга инвестиция жаткырышы үчүн аларды кызыктырууга арнады. Трамптын билдиришинче, АКШда бир нече жылдардан бери уланып келе жаткан кризистен соң мамлекеттин экономикасы кайрадан өнүгө баштаган.
“Биржа бара-бара рекорддук даражага көтөрүлүүдө. Шайлоодон бери биржалар мамлекетибизге 7 триллион доллардан ашык байлык алып келди”,- деди АКШ президенти.
Трамп АКШда аялдар жана Африкадан келген америкалыктардын арасында жумушсуздук тез арада азайганын белгилеп, президенттик мөөнөтү башталгандан бери эки миллиондан ашык адам иш менен камсыздалганын кошумчалады. Анын айтымында, АКШ азыр да инвестиция жаткыруу үчүн эң ыңгайлуу доордо турат. Себеби, анын экономикасы дүйнөдө эң алдыңкы экономикага айланган жана Америка жаңыдан атаандаштыкка туруштук бере турган абалга көтөрүлгөн.
Трамп өзүнүн сөзүндө “терроризм” тууралуу да токтолуп, коалицияга мүчө мамлекеттердин жардамы менен ИШИМдин колундагы аймактар дээрлик 100% кайтарып алынганын айтты. Ал бүгүнкү күндө коопсуздукту камсыздоо максатында АКШ армиясы үчүн “тарыхый каражат” бөлүнгөнүн да кошумчалады.
Трамп, “Коопсуздукту сактабай туруп, кадыржамдыкка жетише албайбыз”,- деп сөзүн аяктады.
