Стамбулда дагы 9 мигрант кармалды
Стамбул полиция башкармалыгынын антитеррор бөлүмү түн жарымында бир эле учурда Зейтунбурну, Тузла, Умрания, Байрампаша, Башакшехир жана Эсенюрт райондорунда “террорго” каршы операция өткөрдү. Операция учурунда Түркиядан баш баанек тапкан 9 мигрант камакка алынды. Алардын бешөө жаш балдар! Камакка алынгандар Түркстан-Дер коомунун мүчөлөрү.
Кармалган адамдар тергөө кылынбай туруп, депортация кылуу үчүн Түркия коопсуздук мекемесинин миграция бөлүмүнө жөнөтүлдү. Кармалгандардын арасында өткөн жылы камакка алынып, миграция бөлүмүндө төрөгөн жана миграция башкармалыгынын жетекчисинин буйругу менен бошотулган Дилафруз Шамсидинова жана анын 3 баласы да бар.
Түркстан-Дер коомунун жетекчиси Бурхан Ковунчи камакка алынган адамдардын “Ислам мамлекети” уюмуна тиешеси жоктугун билдирди. Анын айтымында, бул операциялар мигранттарга мамлекеттин зулуму болуп эсептелет.
“Бул адамдарды камакка алгандар алардын “Ислам мамлекети” уюмуна тиешеси жоктугун жакшы билишет. Алар тергөө кылынбастан туруп миграция бөлүмүнө тапшырылууда. “Терроризмге байланышы бар болушу мүмкүн” деп божомолдоп жатышат. Бул иштер Түркиянын Түркстандык мусулмандарга карата зулуму катары тарыхта калат”, – деди Ковунчи.
Түркияда расмий түрдө жашаган дареги жана жумушу бар Чыгыш Түркстан, Өзбекстан, Кыргызстан жана Тажикстандык мигранттарга каратылган операциялардын натыйжасында кармалган адамдар – Кытай жана Россия менен түзүлгөн “террорчуларга каршы күрөш” келишимине ылайык – өз өлкөсүнө кайтарып жиберүү үчүн миграция мекемесине тапшырылууда. Аларга өз өлкөсүндө кандай мамиле кылынышы жашыруун сыр эмес. Айрыкча, Кытай менен Россияда Исламий туйгулары бар мусулмандар террорчу катары бааланат.
