Казакстан кыргызстандык ишканалардын продукцияларына тыюу салды
Казакстан “техникалык регламенттин талаптары бузулуп жаткан себептүү ” Кыргызстандагы бир топ ишканалардын азык-түлүк продукцияларын алып кирүүгө тыюу салды. Бул тууралуу 10-ноябрда болуп өткөн брифингде башкы санитардык врач Жандарбек Бекшин билдирди.
“Ак-Сүт” сыяктуу ишканалар тынымсыз эреже бузуп жатышат. Биз бүгүн алардын сүт азыктарын алып кирүүгө тыюу салдык. О.э. “Куликовский” кондитердик ишканасынын тийиштүү көрсөткүчтөргө туура келбей турган продукцияларын алып кирүүгө тыюу салынды. Биз ишкер Эмилге Голландия быштагын алып кирүүгө тыюу салдык. Бүгүнкү күндө бул продукция көптөгөн көрсөткүчтөр боюнча техникалык регламенттин талаптарына туура келбейт”, – деди Бекшин.
Казакстандык маалымат агенттиктеринин кабар беришинче, Жандарбек Бекшин билдирүү берип, Кыргызстандан алынып келинип жаткан азыктардын сапаты төмөн экендигин айткан. Бекшиндин айтымында, өткөн жылы Кыргызстандан алынып келинген азыктардын 4 пайызы талаптарга туура келбеген, үстүбүздөгү жылы бул цифра 10 пайызга жакын болду.
Казакстандын айыл-чарба министрлигинин маалыматына ылайык, 21-октябрдан 28 октябрга чейин Казакстан Кыргызстандан келе жаткан 100 тонна продукцияны эреже бузуулар себептүү киргизбеген.
