Дональд Трамп: Сирия согушуна чек коюунун убагы келди
АКШ президенти Дональд Трамп НАТОнун башкы катчысы Йенс Столтенберг менен жолугушту. Жолугушуудан кийин Трамп менен Столтенбергдин катышуусунда маалымат жыйыны уюштурулду.
Маалымат жыйынында Сириядагы согуш тууралуу билдирүү берген Дональд Трамп 2011-жылдан бери уланып жаткан Сирия согушуна чек коюунун убагы алда качан эле келгендигин билдирди. Трамптын айтымында, “террорчулар”ды жеңип, качкындарды үйлөрүнө кайтаруу керек.
“Асад касапчы. Сириядагы ырайымсыз согушка чекит коюунун убагы келди. “Террорчулар”ды жеңип, качкындар үйлөрүнө кайтышына шарт түзүү керек. Россия Сириянын химиялык чабуулун алдын ала билбеген деп ойлойсуңарбы?” – деди Трамп.
Трамптын “Сириядагы ырайымсыз согушка чек коюунун убагы келди” деген сөздөрүн, серепчилер АКШнын Сирияда жаңы пландарды колдонууга ишарасы катары талдап жатышат.
Трамп НАТО жөнүндө да токтолуп, “НАТОнун эскиргендигин айткан элем. Ал пикиримден кайттым…. Мен Рекс Тиллерсон Россияда ийгиликтүү жолугушууларды уюштурганына ишенемин, Путин Россиянын жетекчиси. Россия болсо күчтүү мамлекет. Эгерде Путин жана Россия менен жакшы келише алсак, ажайып иш болмок”, – деди.
Өз кезегинде Йенс Столтенберг да “терроризм”ге каршы күрөштө дагы да көбүрөөк аракет кылуу керектигине көңүлдү бурду. Столтенберг Трамптын сөздөрүн тастыктап: “Баарыбыздын мойнубузга түшкөн милдетти аткарышыбыз керек”, – деди.
