Маккейн: Түркия-Америка союздаштыгы өтө маанилүү
АКШнын жогорку даражалуу саясатчыларынын дагы бири расмий сапар менен Түркияга келди. АКШ Борбордук разведка башкармалыгынын (ЦРУ) директору Майк Помпео жана АКШ армиясынын башкы штаб башчысы генерал Жозеф Дунфорддон кийин Республикачылар партиясынын этибардуу мүчөсү, сенатор Жон Маккейн расмий сапар менен келди.
Аризона штатынын сенатору жана ошол эле учурда Сенаттын Куралдуу Кызматтар комитетинин жетекчиси болуп турган Жон Маккейн Анкарада президент Режеп Таййип Эрдоган менен бир саат, жыйырма мүнөт маектешкенден кийин жазма билдирүү чыгарды. Сенатор өзүнүн билдирүүсүндө жолугушуу жылуу маанайда жана жемиштүү өткөндүгүн билдирип, президент Эрдоган менен аймактык маселелер, айрыкча Сириядагы акыркы кырдаал боюнча кеңири пикирлешкендигин билдирди.
“Европа жана Жакынкы Чыгышта башаламандыктар күчөп бара жаткан бир мезгилде Түркия-Америка союздаштыгы ар дайымкыга караганда маанилүүрөөк”, “ИШИМ (ИГИЛ) уюмун тезирээк жеңүү, душмандарыбыздын жаман таасирине каршы туруу жана региондо күчтөр тең салмактуулугун камсыздоо мүмкүнчүлүгүнө ээ болуу үчүн Түркия менен кызматташтыкта иш алып барышыбыз керек. Ушундай максатта Президент Эрдоган Сирияда коопсуз аймак пайда кылуу жана Ракканы кайрадан ээлеп алуу үчүн бир сунушту киргизди. АКШ бул сунушту олуттуу кабыл алышы керек”, – деди Маккейн.
Түркия жана АКШдагы шериктери менен бул маселелер боюнча иш баштоого ашыгып жаткандыгын айтып өткөн Жон Маккейн, “ушул аракеттер Сириядагы кырдаал АКШ күткөн тарапка өзгөрүшүнө салым кошот” деген үмүттө экендигин билдирди.
О.э. Жон Маккейн бир ай мурда президенттик кызматка киришкен Дональд Трамптын башкаруусуна ишара кылып: “АКШдагы башкаруунун өзгөрүшү Сириядагы учурдагы саясатты кайрадан карап чыгууга маанилүү мүмкүнчүлүк жаратууда”, – деди.
