Уйгурлардын машиналарына көзөмөлдөө жабдыгы орнотулат
“BBC” радиосунун кабарына таянсак, Кытай бийлиги терроризмге каршы күрөштүн алкагында негизги калкы мусулмандар болгон Шинжаң-Уйгур автономиялуу районундагы бардык автомобилдерге көзөмөлдөө жабдыгын орнотууга буйрук чыгарган.
Бийлик аймактагы исламий согушкерлердин чабуулдарына ушундай жол аркылуу чек коймокчу. Полициянын билдиришинче, чабуулдарда негизинен жардыргыч зат салынган автомобилдер колдонулууда.
Ал эми машинасына көзөмөлдөө жабдыгын орнотуудан баш тарткандарга мунай сатып алууга тыюу салынат. Адам укугун коргоочу уюмдар мындай кандуу карама-каршылыкта Кытай бийлигин айыпташат. Себеби, кытай бийлиги уйгурларды массалык түрдө камакка алып, алардын дин тутуу укуктарын чектеп келет.
Автомобилдерди көзөмөлдөө жабдыгы Кытайдын өзүндө чыккан Beidou спутник навигация системасын колдонот.
Beidou системасы АКШнын GPS системасынын ордун ээлөө үчүн сунушталган.
Өкмөттүк Global Times гезитине билдиришинче, бул система аркылуу террорчулар уурдаган машиналарды табуу иши жеңилдейт.
Өткөн аптада бычак менен куралданган үч киши кол салып, беш адамды өлтүргөндөн кийин Шинжаңда коопсуздук чаралары күчөтүлгөн. Кол салгандардын өздөрү полиция тарабынан атып өлтүрүлгөн.
Ишемби күнү Үрүмчү шаарында жүздөгөн куралдуу аскерлер катышкан парад өткөрүлгөн.
Өткөн июнь айында болсо Шинжаң полициясы паспорт алууну каалаган уйгурлардан ДНК жана башка биологиялык анализдерди тапшырууну талап кылган.
