Атамбаев 2010-жылы адамдар курман болушунда Казакстанды айыптады
Кыргызстан президенти Алмазбек Атамбаев Брюсселге сапарында Euronews телеканалына интервью берип, Кыргызстан соода-сатык жүргүзүү үчүн кошуналар менен кызматташуу керектигин айтты жана ЕАЭБ Россия кызыкчылыктарын көздөшү туурасындагы пикирге түшүндүрмө берди.
Euronews каналынын журналисти Атамбаевден: “Сиз бул биримдик көбүрөөк Россиянын кызыкчылыктарын көздөшү жана Лукашенко айткандай, Кыргызстан да пайдасыз абалда калышы мүмкүн деп эсептейсизби?”- деп сурады.
Атамбаев: “2010-жылы Казакстан 1,5 айга жолдорду жапканда бизде адам өлүмү да болгон. Мына ушундай болгон, анткени блокада – бул жаман нерсе… Бизге альтернативдүү уюмду сунуштай алышабы, биз кимге кошулушубуз керек эле? Афганистангабы? Керек болсо, биз бүгүн эле Европа Союзуна кирүүгө даярбыз. Мен муну сунуштаганмын, бирок мага бизде жалпы чегаралар жоктугун ачык айтышкан. Анда бизге эмне сунуштай аласыңар? Бизде 6 млн адам бар. Тумчуланып эле өзүбүз менен өзүбүз болуп жунглидегидей жашашыбыз керекпи? Биз өнүгүшүбүз керек, бизге рынок керек”, – деди.
Журналист Атамбаевдин ЕАЭБ биринчи кезекте Россиянын кызыкчылыктарын көздөшү туурасындагы пикирин сурады.
Атамбаев: “Мен билбеймин, балким Россия же анын жетекчилери ушундай каалагандыр. Бирок, бүгүнкү күндө бул биримдик Кыргызстанга пайдалуу. Мисалы, Россияда биздин жарым миллионго жакын мигранттарыбыз бар, алар эгемендүүлүк жылдары ар түрдүү себептерден улам ал жакка көчүп кетишкен. Кээ бирлери ал жерде 20-30 жылдан бери жашап келет. ЕАЭБге киргенибизден кийин аларда укуктар пайда болду. Мурда ал жерде кулдар сыяктуу болушкан. Эми болсо, укуктары корголот жана жумушка орношо алышат”,-деп жооп берди.
