Атамбаевди сындоо мүмкүн эмеспи?
Жалал-Абаддык жарандар “Фейсбук” социалдык тармагында президент Алмазбек Атамбаев тууралуу жазгандыгы үчүн коопсуздук кызматына үч күн сурак берип, эскертүү алышты. Сузактын төрт, Базар-Коргондун беш, Аксынын эки жаранына эскертүү берилген. Бул тууралуу суракка чакырылган жарандар “Азаттык” радиосуна билдиришкен. Алар коопсуздук кызматынан эскертүү алышкан соӊ “Фейсбук”ка жазбай койгондугун айтышкан.
Өз кезегинде УКМКнын областтык башкармалыгы бул кабарды төгүнгө чыгарып, эч ким суракка алынбагандыгын билдирди.
10-январда кээ бир маалымат каражаттары нда жана “Фейсбук”та УКМК төрагасынын орунбасары Болот Сүйүмбаевдин “Фейсбук”та президент Атамбаев тууралуу терс пикир билдирген 45 киши аныкталганын, алардын жашаган жери жана интернет даректери иликтенип жатканы тууралуу Жогорку Кеӊештин депутаты Ирина Карамушкинага жазган жооп каты жарыяланган болчу.
Туркистон:
Социалдык тармактарда, айрыкча “Фейсбук”та Кыргызстан бийлиги жүргүзүп жаткан саясатты сындап, бийликтин чыныгы жүзүн ачып жаткан макала жана посттор көбөйүп бара жатканы расмий бийликти тынчсыздандырып койгон окшойт. Расмий бийлик өз адаты боюнча – мындай көрүнүштөрдүн алдын алуу үчүн колдоно турган ишенимдүү ыкмасы – коркутуу саясатын баштап жиберди.
УКМК бийликке отчёт берүү үчүн президентти сындаган жарандардын жашаган жерлерин жана интернет дарегин аныктоого киришип, бир катар кыргызстандык жарандардын тизмесин жарыя кылды. Кызык жери, атайын кызмат жарыя кылган тизме чындыкка туура келбегендигинде. Өзүн “Жердин алдындагы жыландын кыймылдаганын сезүүчү” деп эсептеген атайын кызмат “Фейсбук” колдонуучулардын интернет дарегин аныктай албастан, туш келген жаран же мамлекеттердин атын атаптыр. Бул иштен көздөлгөн максат, жарандарды кандай жол менен болсо да коркутуп, бийлик жүргүзүп жаткан саясатка терс мамиле билдирбей, оозуна талкан салып алгандай унчукпастан моюн сунууга мажбурлоо.
