Анкарада дагы бир “Келишим” алдоосу
Сирияда тынчтык келишимин жарыя кылуу көздөлгөн Астана сүйлөшүүлөрүнүн алдында Түркиянын борбору Анкарада Сирия оппозициясынын өкүлдөрү менен Россия ортосунда сүйлөшүүлөр башталды. Бул тууралуу “Риа Новости” маалымат агенттиги жогорку даражалуу дипломатка таянып кабарлады. Агенттиктин кабарына таянсак, сүйлөшүүлөр Түркия ортомчулугунда бүт Сирия бойлоп келишим жарыя кылуу максатында жүрүп жатат.
“Риа Новости” маалымат агенттиги аскерий булакка таянып тараткан башка бир кабарда болсо, Сирия режими менен оппозициялык топтор ортосунда боло турган Астана сүйлөшүүлөрүндө катышуучу жалаӊ гана аскерий кубатка ээ топтор экендиги кабарланды.
Түркия президенти Режеп Таййип Эрдогандын маалымат катчысы Ибрахим Калин да Россия менен Түркия ортосунда Сирия бойлоп тынчтык келишимин жарыя кылуу үчүн сүйлөшүүлөр жүргүзүлүп жаткандыгын билдирди.
“Сириянын бардык жерлеринде келишимге жетишүү үчүн аракет кылып жатабыз. Путин менен Эрдоған тез-тез байланышып жатат. Астана сүйлөшүүсүнө тиешелүү жолугушуулар да уланууда. Жакында кимдер катыша тургандыгы анык болот. Биздин максатыбыз Сирияда саясий өткөөл мезгилин тезирээк пайда кылуу. Эӊ маанилүүсү, Астанада катыша турган оппозиция өкүлдөрү ишенимдүү кишилер болушу керек. Астанадагы жараян буга чейин Женевада башталган жараяндын уландысы болуп эсептелет”, – деди Калин.
Белгилүү болгондой, бул сүйлөшүүлөр Халаб (Алеппо) Асаддын колуна өтүшү үчүн түзүлгөн планды бүт Сирия бойлоп ишке ашыруу үчүн о.э. Асад режими бүтүндөй Сирияны көзөмөлдөшүн камсыздоо максатында ишке ашырылып жатат. Сириядагы куралдуу оппозиция өкүлдөрү буга чейин да Түркия ортомчулугунда сүйлөшүүлөрдү өткөргөн эле. Бул нерсе Түркияга караштуу топтор Халабдан чегиниши себептүү Халаб фронтунун алсырашына жана кулашына себеп болду.
