Атамбаев: Путин менен Назарбаев менден экинчи мөөнөткө калууну суранышты
Алмазбек Атамбаев 1-декабрдагы жылдык маалымат жыйынында: “Россия президенти Владимир Путин жана Казакстан президенти Нурсултан Назарбаев менден экинчи мөөнөткө калууну суранышты”,- деди.
Анын айтымында, Россия жана Казакстандын жетекчилери андан мөөнөтү аяктагандан кийин кетпестикти суранышкан. “Бирок мен андай кыла албасымды, азыр элибиз башкача экенин түшүндүрдүм. Ал кимди татыктуу деп эсептесе ошону өзү тандап алышын айттым”,- деди Атамбаев.
Россиянын аскерий базасы жөнүндө берилген суроого жооп берип, Россия Кыргызстандын стратегиялык өнөктөшү болуп калышын, бирок аскерий маселеде мамлекет өзүнүн күчүнө таянышы керектигин билдирди.
Ал: “Биз “Ганси” базасы боюнча туура иш кылдык. Көпчүлүгүнө жакпашы мүмкүн. Беш жыл өттү жана өткөн убакыт бул туура чечим болгондугун көрсөттү. Кыргызстан келечекте өзүнүн күчүнө гана ишениши керек. Бул Россиянын базасына да тиешелүү”, – деди.
Атамбаевдин баса белгилешинче, база Кыргызстан аймагынан келишим мөөнөтү аяктагандан кийин “чыгып кетиши керек болот”.
Ал: “Албетте, бул нерсе кимдир бирөөлөргө жакпашы мүмкүн. Бирок, Россия президенти бардыгын түшүндү. Мени Американын базасын чыгарып жиберип, Россияныкын калтырып койду деп сындап жатышат. А бирок, Россия менен келишим түзүлгөн. 2016-жылы мөөнөт бүтөт. Дагы 49 жылга болушу керек эле, бирок биз 15 жылга калтырдык”, – деп айтты.
Белгилүү болгондой, 2009-жылдагы келишим боюнча, Россия базасынын алгачкы мөөнөтү 2016 -жылы аяктап, андан соӊ 49 жылга калышы керек болчу жана ар бир 25 жылда узартылып турушу мүмкүн экендиги белгилеп коюлган болчу.
