Россия менен Өзбекстан аскерий-техникалык кызматташтыкты өнүктүрөт
Россия өкмөтү “Россия менен Өзбекстан ортосунда аскерий-техникалык кызматташтыкты өнүктүрүү туурасындагы” келишимди кол коюу үчүн президент Владимир Путинге сунуштады.
“Россия Федерациясынын өкмөтү токтом кылат: Россия коргоо министрлиги тарабынан сунушталган жана Россия тышкы иштер министри жана аткаруу бийлигинин башка кызыкдар органдары менен келишилген о.э. алдын ала Өзбекстан менен карап чыгылган, Россия менен Өзбекстан ортосунда аскерий-техникалык кызматташтыкты өнүктүрүү туурасындагы келишим макулдансын. Бул келишим кол коюу үчүн Россия президентине сунушталсын”, – деп айтылат Россия өкмөтүнүн 2016-жыл, 18-ноябрдагы токтомунда.
Келишимдин максаттары, аскерий-техникалык тармакта кызматташтыкты дагы да тереӊдетүү; курал жана аскерий техниканын өнүккөн үлгүлөрү менен камсыздоо системасын калыптандыруу; куралдуу күчтөр, аскерий бөлүктөр, укук коргоо мекемелери жана атайын органдардын кызыкчылыгы жолунда аскерий максаттагы продукцияларды пайда кылуу, иштеп чыгаруу, ремонттоо, модернизациялоо, аларга кызмат көрсөтүү жана зыянсыздандыруу тармагында илимий-техникалык жана иштеп чыгаруу технологиялык мүмкүнчүлүктөрдү колдоп-кубаттоо; мамлекеттин коргонуу жөндөмүн бекемдөөдөн турат.
Келишим аскерий-техникалык кызматташтык тармагындагы программаларды жаратуу, тараптардын ыйгарым укуктуу мекемелери жана уюмдары ортосунда келишимдерди түзүү, аскерий-техникалык кызматташтыктын анык маселелери боюнча кеӊешмелерди өткөрүү жана адистерди сунуштоо менен ишке ашырылышы мүмкүн.
Келишимди ишке ашыруу боюнча жооптуу мекемелер болуп, Россиянын аскерий-техникалык кызматташтык боюнча федералдык кызматы жана Өзбекстан коргоо министрлиги дайындалды.
Туркистон:
Россия АКШнын өзбек армиясын толук модернизация кылып жиберүү аракеттеринин алдын алып калды. АКШ Афганистандан чыгып бара жатканынан пайдаланып, бүтүндөй аскерий-техника арсеналын бекерге таштап кетмекчи болду. Бул техникалардан пайдаланууну үйрөтүү максатында аскерий инструкторлорду берип, аскерий техникалык жабдыктар менен үзгүлтүксүз камсыздап туруу механизмин сунуштады. Бирок, Россиянын бир катар басымдары менен бул долбоор ишке ашпай калган эле.
Эми АКШ сунуш кылган операцияны Россия улантмакчы болууда. Т.а. Өзбекстан армиясынын көп бөлүгүндөгү мөөнөтү аяктаган аскерий техникаларды жок кылып, анын ордуна жаңы, же ошол эски типтеги жаңы иштеп чыгарылган техника жана куралдар менен камсыздаганы жатат. Бул аракет, Россия үчүн курал-жарак жана аскерий техникага муктаж болгон бир мамлекетти колунда кармап калуу мүмкүнчүлүгүн берет. Т.а. бул механизм Өзбекстан дагы кайрадан Россиянын аскерий колониясы катары калып жаткандыгын билдирет.
