Президент Аида Салянованын мыйзамына кол койду
Белгилүү болгондой, Жогорку Кеӊештин депутаты Аида Салянова (Ата-Мекен фракциясы) менен анын кесиптеши Элмира Жумалиева (Кыргызстан фракциясы) расмий каттоодон (ЗАГСтан) өтпөй туруп нике кыюуга тыюу салуу демилгесин көтөрүп чыгышкан эле.
“Үй-бүлө кодекси” жана “Кылмыш жаза кодексине” киргизилген өзгөртүүлөргө ылайык, расмий каттоодон өтпөгөндөрдүн жана балагат жашына жетпегендердин турмуш курушуна макулдук берген ата-энелер, нике кыйган диний кызматкерлер (молдо) жана турмуш курууга ыраазы болгон жаштар 3 жылдан 5 жылга чейин эркинен ажыратылат.
Жогорудагы мыйзам долбоору Кыргызстан мусулмандары тарабынан кескин каршылыктарга дуушар болушуна карабастан, Жогорку Кеңеш бул мыйзам долбоорун тастыктап, кол коюу үчүн президентке сунуштады.
Президент Алмазбек Атамбаев 18-ноябрь күнү аталган мыйзам долбооруна кол койду. Президенттик аппараттын кабар беришинче, бул мыйзам жашы жете электерге диний жөрөлгө боюнча нике кыюунун алдын алуу үчүн кабыл алынды.
Мыйзам расмий жарыя кылынгандан 30 күндөн кийин күчүнө кирет.
Туркистон:
Бул мыйзам долбоору муслима кыздарыбызга зулум кылуу үчүн куфр малайларынын долбоору негизинде иштелип чыккан. Жогорудагы мыйзам долбоору – дээрлик бүтүндөй Кыргызстан мусулмандары каршы чыккандыгына карабастан – парламент тарабынан тастыкталды. Себеби, бул депутаттар да батыш дүйнө карашынан таасирленген демократиялык күчтөрдүн басымынан коркушат.
Белгилүү болгондой, мыйзам долбоору биринчи жолу депутаттар тарабынан кабыл алынбай артка кайтарылганда, мамлекеттик эмес уюмдар ызы-чууга түшүп, телевидение жана ЖМКлар аркылуу чыгышып, бул мыйзам долбоору парламенттен өтүшү керектигин тынымсыз кайталашкан эле.
Мыйзам долбоорунун демилгечилери, парламент депутаттары о.э. президент да 18 жашка чыга элек кыздардын адал нике менен турмуш курушуна каршы чыгышкан болсо да, никесиз төрөп жаткан жаш кыздар, тирүүлөй жетим калып жаткан наристелер көбөйүп жаткандыгына көӊүл буруп коюшпады. Кечээ күнү ЖМКлар Санкт-Петербур шаарында төрөгөн баласын таштанды челегине таштап жиберген кыргызстандык кыз тууралуу жазып чыгышты.
Мындан тышкары, Саламаттыкты сактоо министрлиги берген расмий маалымат боюнча, 17 жашка чыга элек миӊ кыздан беш кыз никесиз төрөп жатат. Бул болсо, жыл сайын 13төн 17жашка чейинки аралыктагы 200 кыз арамдан төрөп жатат дегенди түшүндүрөт.
“Расмий маалыматтарга ылайык, Кыргызстанда аборт кылдырып жаткан аялдардын 0,7 пайызы 17 жашка чыга элек кыздардан турат. Бул нерсе бир жылда болжол менен 180 жаш кыз аборт кылдырып жатканын билдирет”,- деген эле саламаттыкты сактоо боюнча белгилүү адис Айгул Бообекова.
Булар расмий статистикалык маалыматтар. Ал эми биздин менталитетибизден келип чыгып, каттоодон өтпөй жашыруун аборт кылдырып жаткандарды жана чет өлкөлөрдө төрөп таштап кетип жаткандарды кошо турган болсок, бул цифралар бир нече эсеге көбөйүп кетет.
