Азанга да тыюу салынды
Кыргызстан президенти Алмазбек Атамбаев ШКУнун Ташкенттеги саммитине катышып келгенден кийин Ислам динине каршы күрөштү жаңы баскычка алып чыкты. Аталган саммиттин алкагында жабык эшиктер артында өткөн жолугушууда Каримов Атамбаевден Ислам жана мусулмандарга каршы күрөштү күчөтүүнү талап кылып, бул үчүн жардам берүүнү убада кылган окшойт.
Бул жолугушуунун “алгачкы жемиши” көпкө күттүрбөдү. Алгач бийликтин буйругу негизинде муфтият Орозо айтты 10 күн мурун белгилеп койду. Кыргызстанда жаңы шаввал айы көрүнбөгөн болсо да мусулмандарды намаз окууга мажбур кылды. Президент жана муфтияттын көрсөтмөсү менен эмес, тескерисинче, пайгамбарыбыз Мухаммад саллаллаху алайхи ва салламдын:
صوموا لرؤيته و أفطروا لرؤيته فان غمى عليكم فأكملوا العدد
“Айды көрүп орозо кармагыла, айды көрүп ооз ачкыла! Эгерде асман булуттуу болуп, ай көрүнбөсө, анда толук отуз күн кылгыла!” – деген буйругуна ылайык, шаввал айынын биринчи күнүндө т.а. 6-июлда айт намаз окуйбуз деген мусулмандарга тоскоолдук кылынды.
Ислам баалуулуктарына каршы алгачкы кескин кадамды таштаган Атамбаевдин тымызын буйругу негизинде Чубак ажы Жалиловдун ЖМКларга чыгышына тыюу салынды. Германия канцлери Ангела Меркелдин Кыргызстанга сапарынын алдында болсо Бишкек шаарында исламий баалуулуктарды акаараттаган баннерлер пайда болду. Меркел менен жолугушуудан кийинки маалымат жыйынында болсо Атамбаев мындай баннерлерди жалпы республикага илип чыгууга көрсөтмө бергенин билдирди. Натыйжада мындай баннерлер мамлекеттин бир катар облустарында пайда болду.
Эми кезек мечиттеги үн күчөткүчтөргө жетип келди. Ушул кезге чейин үн күчөткүчтөр менен азан айтылышына эч кандай нааразылык билдирбеген шаардыктар Атамбаев Ташкентке бары келгенден кийин “арыздана башташты”.
19-июлдан баштап Бишкек шаарында түнкүсүн үн күчөткүч менен азан айтууга тыюу салынды. Мамлекеттик санэпидкөзөмөл кызматынын билдиришинче, шаар тургундары мечиттерде түнкүсүн айтылган азан уйкусун бузуп жатканы тууралуу арызданышкан имиш. Ошол себептен улам, мамлекеттик санэпидкөзөмөл кызматы шаардагы мечиттерде үн күчөткүч аркылуу азан айтууга тыюу салды. Бул тууралуу бардык мечиттерге эскертүү берилди.
Кыргызстан бийлиги, айрыкча, президент Алмазбек Атамбаев эмне кылып жатканын жана элди кайда жетектеп баражатканын да билбей калган окшойт. Бийликтин максаты эмне? Көпчүлүгү мусулмндардан турган элдин арасында жасалма жол менен бөлүнүү пайда кылып, башаламандыктарды уюштуруубу, же мусулмандардын туйгуларына жана баалуулуктарына тийишип, мусулмандар тараптан боло турган бирер жагымсыз натыйжаны жүзөгө чыгаруубу?
Же расмий бийлик куфр мамлекеттеринен акча алуу үмүтүндө алар койгон бардык талаптарды аткара бере турган болуп калганбы?
