Араб мамлекеттери Лигасынын алдындагы Араб парламентинин улуттук коопсуздук жана тышкы саясат комиссиясы Сириянын Халаб шаарында жүз берген өзгөрүүлөрдү талкуулоо максатында кезексиз жыйын өткөрдү. Жыйналыш Араб мамлекеттери Лигасынын Каирдеги штаб-квартирасында болуп өттү. Жыйында Араб парламенти Сирияга Араб тынчтыкты сактоо күчтөрүн жиберүү сунушун киргизгендиги айтылууда. Алардын айтымында, Араб тынчтык сактоочу күчтөрү Сирияда келишилген ок атышууну токтотуу келишимин о.э. шаарлардагы блокадаларды алып таштап, гуманитардык жардамдарды жеткирип берүүнү камсыздайт экен.
Жыйналыштан кийинки Араб парламентинин төрагасы Ахмад бин Мухаммад ал-Жарван “келишимдин уланышы жана шаарлардагы блокадаларды алып таштап, гуманитардык жардамдар жеткирип берилиши үчүн бардык Араб мамлекеттерин Сирияга тынчтык сактоочу күчтөрдү жиберүүгө чакырабыз”, — деди.
Ал-Жарван бул күчтөрдүн кандай жосунда жиберилиши туурасында берилген суроого “Араб парламенти мыйзам чыгаруучу жана көзөмөлдөөчү орган эмес. Анын куралдуу күчү же финансылык мүмкүнчүлүгү жок, бирок таасири бар. Биз чет элдик күчтөрдүн Сирия маселесине аралашуусуна каршыбыз”, — деп жооп берди.
Сирияда 27-февраль күнү күчкө кирген жана убактылуу келишим деп аталган ок атышууну токтотуу бүтүмү режим күчтөрү тарабынан бир нече жолу бузулуп келүүдө. Өткөн айда АКШ менен Россия бул келишим Лазкия жана Дамаск шаарларын да өз ичине алышы тууралуу келишип алышкан эле.
