Өкмөттүн маалыматтык саясат бөлүмүнүн башчысы Назира Ахмедованын “Азаттык” радиосуна билдиришинче, Россия телеканалдарына өзгөчө макам берүү туурасындагы токтом коомдук талкуусуз кабыл алынат. Анын айтымында, кыргыз-орус макулдашуусу коомдук талкуудан алынып салынган, бирок коомчулуктун пикири эсепке алынат.
“Бул макулдашуу болгондуктан, аны талкууга чыгарууга болбойт, зарылчылык жок. Өкмөт аны карап же кол коёт, же карабайт. Бул Россиянын демилгеси, аны кыргыз тарап карай элек. Кандай гана токтом болбосун коомдук талкууга чыгып жатат. Эгер бул макулдашууга эл каршы болсо, өкмөт аны эске алып, жыйынтык чыгарат”, – деди Ахмедова.
Туркистон:
Кыргызстан өкмөтү үчүн элдин экономикалык же моралдык абалы о.э. дүйнө карашы кандай болушунун эч кандай мааниси калбаган окшойт.
Мамлекет ЕАЭБге киришинин алдында Кыргызстан бул уюмга мүчө болушу боюнча Россия даярдаган жол картасын тастыктоодо да элдин пикири эсепке алынбаган эле. Ошондо жол картасын өкмөттөгү саналуу адамдардан башка эч ким, а түгүл депутаттар да көрүшпөгөн болсо да, жол картасы тастыкталып, Кыргызстан ЕАЭБге мүчө болду.
ЕАЭБге мүчө болуунун терс натыйжалары көпкө күттүрбөдү. Бүгүнкү күндө он миңдеген адамдарды жумуш менен камсыздаган Дордой, Кара-Суу базарлары жабылайын деп калды. Кыргызстан экономикасынын негизи болгон реэкспорт азайып кетишинин натыйжасында болсо мамлекеттин бюджетиндеги дефицит жылдан-жылга көбөйүп барууда.Расмий өкмөт болсо эч бир уялбастан, бул кыйынчылыктар убактылуу болуп, үч-төрт жылдан кийин өтүп кетишин айтып жатат. Бул үч-төрт жылдын ичинде болсо жоон сүзүлүп, ичке үзүлүшү менен эч кимдин иши жок. Өкмөттүн бирден-бир кайгысы кантип болсо да Россияны ыраазы кылуу жана анын талаптарын сөзсүз аткаруу болуп калды.
Бүгүнкү күнгө келип Россия“Биринчи канал” (ОРТ) жана “Россия РТР” каналдарына өзгөчө макам берүүнү талап кылууда. Өкмөт алгач бул маселени коомдук талкууга чыгарууга токтом кылды. А бирок, коомчулук буга терс пикир билдире баштагандан кийин аны талкуудан алып таштады жана өкмөттүн жалгыз өзү токтом кабыл ала турган болду. Мейли, өкмөт азырынча элдин пикири да эсепке алынышын айтып, сиз менен бизди алдоого умтулуп жаткан болсо да, кудум мамлекетти ЕАЭБге алып киргени сыяктуу эле, Россиянын бул талабын да сөзсүз аткарат.
Россия калкынын 80 пайыздан көбүрөөгүн христиандар түзөт. Демек, телеканалдар да мына ошол ишеним жана дүйнө караштан келип чыгып көрсөтүүлөрдү даярдайт. Ал эми бул көрсөтүүлөр алкынын 85 пайыздан көбүрөөгү мусулмандар болгон Кыргызстанда өзгөчө макамга ээ болушу, Россия өзүнүн бузук дүйнө карашы жана саясаты менен карапайым калкты моралдык жактан бузушу өкмөттү кыпындай да тынчсыздандырбайт.
