Израиль: Региондогу кырдал маанилүү маселелерде келишүүгө мажбур кылууда

Түркия жана Израиль ортосунда кызуу сүйлөшүүлөр уланууда. Бул тууралуу Израилдин премьер-министри Бенямин Нетаняхунун атайын өкүлү жана Тышкы иштер министрлигинин башкы директору Доре Голд билдирди. Голддун башкы офиси Лондондо жайгашкан “Suudi Elaph” интернет сайтына интервью беришинче, Түркия менен сүйлөшүүлөр оң тарапка карай өзгөрүүдө.

“Өз ара келишилген жана сүйлөшүүлөр уланып жаткан маселелер бар, бирок, (эмнеси болгондо да) иштер туура багытка карай бара жатат”, – деди Голд.

Региондо жүз берген өзгөрүштөр себептүү эки мамлекеттин коопсуздук, экономикалык жана региондук кызыкчылыктары кагышып калгандыгы тууралуу сөз кылган Голд өз ара келишүү жүзөгө чыгышына ишене тургандыгын билдирди. Себеби Голддун айтымында, региондо жүз берип жаткан өзгөрүштөр эки мамлекетти келишүүгө мажбур кылууда.

“Мен ортодо бир келишүү жүзөгө чыгышы аз калгандыгына ишенемин. А бирок, келишүү үчүн бир убакыт белгилеген жокпуз. Региондогу абал бизге маанилүү маселелерде келишүүдөн башка тандоо калтырбай жатат. Биздин дипломаттарыбыз ушул негизде иштеп жатышат”, – деп кошумчалады Нетаняхунун атайын өкүлү.

Түркия президентинин маалымат катчысы Иброхим Калин да кечээ Түркиянын Израиль менен мамилеси жакшыруусу үчүн Израиль тарап Мармара окуясында өлтүрүлгөн шейиттер үчүн кечирим сурашы шарт экендигин дагы бир жолу кайталады. Калиндин айтымында, кечирим суроодон тышкары Израиль шейиттердин үй-бүлөсүнө кун төлөө жана Газа курчосун алып таштоо шарттарын да аткарышы керек.