АКШ президенти Барак Обама Нью-Йоркто уюштурулган БУУнун башкы ассамблеясында Сирия маселеси тууралуу сөз сүйлөдү. Россия мамлекети АКШ үчүн керектүү экендигин билдирген Обама дүйнө мамлекеттери арасында Москва өз позициясына ээ болушу керектигин баса белгилеп өттү. Обаманын айтымында, Украина кризиси себептүү АКШнын Россияга карата киргизген санкциялары эки мамлекет ортосунда суук согуш кайра башталгандыгын түшүндүрбөйт.
“Россияны ар тараптуу курчоого алууну каалабайбыз. Бизге күчтүү бир Россия керек”, “Канчалык күчтүү армияга жана канчалык күчтүү экономикага ээ болсок да, Америка Кошмо Штаттары дүйнөнүн проблемаларын жалгыз өзү чечүүгө кудуреттүү эмес. Биз муну жакшы билебиз. Жүз миӊдеген АКШ аскерлеринин Иракка жөнөтүлүшү жана бюджеттен триллиондогон долларлардын бөлүнүшү бөтөн аймакта туруктуулукту пайда кыла албастыгын көрдүк. Бул биз үчүн жакшы сабак болду”, – деди АКШ президенти.
Сирия маселесин чечүү үчүн бардык мамлекеттер, ошону менен бир катарда Россия жана Иран менен да кызматташтыкта аракет кылууга даяр экендигин билдирген Обама АКШ жана союздаштарын коргоо үчүн эч бир экиленбестигин айтты. Бирок, Обама АКШ жана союздаштарын кандай коркунучтан коргоо керек болуп калгандыгын айтпады.
