Россия президентинин 2014-жылдын күзүндө Токиого сапар кылышы пландаштырылган эле. Бирок, Японияда басылып чыгуучу “Kyodo” басылмасынын кабар беришинче, АКШнын талабына ылайык, Япониянын премьер-министри Синдзо Абе Путиндин сапарын кечиктирди.
Басылманын өкмөткө жакын булагынын айтымында, Вашингтон премьер-министр Синдзо Абеге Путиндин сапарын калтырууну сурап кайрылган.
“Украина кризисинин артынан АКШ жана Япония биргеликте Россияга карата санкцияларды киргизген Европа мамлекеттери менен бир катарда болуу зарыл экендигин Токио түшүнүп турат,”- деди булак.
Булактын кошумча кылышынча, Япония премьер-министри Россия президенти менен ноябрь айында Пекинде болуп өтүүчү Азия-Тынч Океаны экономикалык кызматташтыгы саммитинде жолугушуу ниетинде. АКШ жана Россия ортосундагы мамилелерге карай Путиндин Токиого сапары эмдиги жылдын жаз мезгилине же андан да кийинкиге белгилениши мүмкүн.
