Тажикстанда “зыяндуу” адабияттар катуу көзөмөлгө алынды
Тажикстан маданият министрлиги өкмөттүн атайын уруксатысыз мамлекетке китеп алып кирүүгө жана алып чыгууга тыюу салды. Бул тууралуу Тажикстан маданият министрлигиндеги тарыхий жана маданий мурастан пайдалануу о.э. аны коргоо бөлүмүнүн башчысы Шерали Ходжаев билдирген.
Анын айтымында, саны канча экендигине карабастан, китеп алып кирип жаткан ар кандай жаран маданият министрлигинен уруксат алышы керек. Бул токтом бардык китептерге тиешелүү болуп, бул жерде китептин кайсы тилде жазылгандыгынын мааниси жок.
Акыркы маалыматтарга ылайык, Тажикстандын бажы кызматкерлери чегаралардан өтүп келе жаткан перс жана араб тамгаларында жазылган ондогон китептерди конфискация кылышкан. Тажикстандык серепчилердин бири Саъди Юсуфинин айтымында, өкмөт бул токтомду мамлекетке кооптуу диний агымдардын адабияттары кирип келишинин алдын алуу максатында чыгарган. Ошону менен бир катарда бажыкана кызматкерлеринин диний сабаты жоктугу себептүү жана араб, перс тамгаларын жетиштүү даражада билбегендиктен, алар ар кандай бейтааныш адабияттарга шек-күмөн менен жандашып, конфискация кылышууда. Буга чейин Тажикстан Ички иштер башкармалыгы жана дин иштери боюнча комитети тарабынан “кооптуу” абадияттар тизмеси түзүлгөн эле. Ал тизме боюнча 13 адабият ИИМдин “кара тизмесине” киргизилген.
Кыскасы, бардык диний таалимге негизделген китептер өкмөт тарабынан катуу көзөмөлгө алынды. Дин иштери боюнча комитеттин алдында атайын кеңеш түзүлдү. Китептерди алгач ушул кеңеш иликтеп чыгып, коопсуз деген аныктама бергенден кийин гана алардан пайдаланууга уруксат берилет.
