Мистура АКШ жана Россияны болгон күчү менен аракет кылууга чакырды

БУУнун Сирия боюнча атайын өкүлү Стеффан Де Мистура эгерде Сирияда ок атууну токтотуу келишимине амал кылынса, тараптар сүйлөшүү столуна отурушу мүмкүн экендигин билдирди. Ал үчүн АКШ менен Россияны келишимди сактап калуу үчүн болгон күчү менен аракет кылууга чакырды.

Де Мистура БУУнун Коопсуздук Кеңешин Женевадагы Сирия боюнча сүйлөшүүлөр тууралуу телеконференция аркылуу кабардар кылгандан кийин журналисттер үчүн атайын билдирүү берди. Сирияда чабуулдар уланып жаткандыгына көӊүлдү бурган Мистура мындай абалда сүйлөшүү өткөрүү мүмкүн эместигинен тынчсызданып жатканын билдирди.

Мистура: “Согуштарды токтотуу келишиминин тынчсыздандыруучу даражада начарлап кетиши сүйлөшүүлөргө зыянын тийгизди. Сүйлөшүүлөр учурунда күн сайын бирден окуя жүз берип турду. Бир нече саат мурда Халабдын чыгышындагы ооруканага уюштурулган чабуулдун натыйжасында акыркы педиатр (жаш балдарды дарылоочу доктор) да өлтүрүлдү. Акыркы 48 сааттын ичинде ар бир 25 мүнөттө бирден сириялык өлтүрүлгөн, ар бир 13 мүнөттө болсо бир сириялык жарадар болгон”, – деди.

Тараптар ортосундагы түшүнүктөрдө дагы деле өтө чоӊ айырма бар экендигине басым жасаган Мистура сөзүн улантып: “Июль айына чейин жок эле дегенде бир, же эки жолу сүйлөшүүлөр болот… Согуштарды токтотуу келишими ар кандай убакта жокко чыгышы мүмкүн, аны куткарыш керек. АКШ жана Россия февраль айында кылганы сыяктуу “согуштарды токтотуу келишимин” кайрадан ишке ашыруусу керек. Жолугушууларды май айында баштоону пландаштырып жатам, а бирок согуштарды токтотуу келшими жана зомбулукту азайтуу февраль айындагы деӊгээлине жетсе, мына ошондо гана кийинки раунддун кайрадан башталышы мааниге ээ болот. Ошондуктан, мен АКШ жана Россияны болгон күчүн жумшап, аракет кылууга чакырамын”, – деди.

Акыркы кабарларга ылайык, Америка менен Россия Сирияда согуштарды токтотуу туурасында келишип алышкан. Россиянын РИА жана ТАСС маалымат агенттиктери таркаткан кабарларда айтылышынча, Сирияда ок атууну токтотуу жумадан ишембиге өткөн түндөн баштап күчүнө кирген. Бул абал Мистуранын чакырыгынан эч канча убакыт өтпөстөн жүз берди.